Micheli Còntini, fatu a limbista e cumponente de sa cummissione soriana po su sardu, s'est cunfessau a su Giornale di Sardegna. E ite cunfessione, ite peccadu in s'intervista de Marco Sedda de su 6 de austu 2005. Su Còntini-pentzu est custu in sìntesi.
Unu, sa limba sarda dd'ant ruinada sos "diletantes de sa cultura".Chie sunt? Non s'ischit. De seguru non sos professorones che a issu "per 14 anni direttore del centro di dialettologia dell'Università di Grenoble”. In capas cussos militantes e ativistas chi tenent su peccu mannu de ddue crèdere a sa limba, e chi dda foeddant e dd’iscrient. Mentres issu dda foeddat? Dd’ischit fàere una « conversazione » in sardu? Boh?!
Segundu. Giuanne Lilliu est unu paru de inniorante cando foeddat de “limba” sarda, proite in Barùmini si narat « lingua » e duncas s’archeòlogu faddit. Mancu male chi Còntini s’intendet capassu de ddu currègere. Beniminde.
De tres. Po isciòllere sos problemas de sa limba sarda at propostu de fàere un’acadèmia e un’atlante limbistìcu.Gastu 1,2 miliones de euros. Po impreare a chie ? Istudiosos chi no dd’ischint foeddare su sardu ma presumint de decidere comente dd’iscriere e cale sardu uficializare? Ma si no iant a colare mancu una seletzione po isportellu limbìsticu…
De battoro. Sa Limba Sarda Unificada est galu sa proposta mengius de cussas po uficializare su sardu, ma issu Còntini sighit a propònnere su nugoresu proite <si parla esattamente come si scrive ed è l’unica varietà che presenta questa caratteristica>.
Perunu cummentu a custu. Solu sos cumplimentos a Soru po sos espertos chi at numenau in cummissione po sa grafia unitària.
