Bos do sa definizione de sos “VI.S.I.”: sun sas Vittimas de su Sardu Illustre.
Chi cheret narrer chi b’hat galu zente in Saldigna chi creet chi esistat unu saldu “eru e puru”.
Ja lu cumprendides a sa sola chi su cunzettu de puresa est roba de nazistas ma bidimus si custu est possibile, o menzus ue naschet custu ilbagliu.
Su biadu de Wagner haiat iscrittu chi in zeltos fenomenos a su nessi, su logudoresu est su saldu pius cunservativu, ma calchi bonomine hat cumpresu chi su logudoresu o sos logudoresos fini menzus de sos atteros saldos. A chie non bi tenet attera cosa ja li bastat custu puru. Ma su malu est ca zeltos “intellettuales” fentomados hana cavalcadu custu fraintendimentu chin maliscia fattende dannu e creende divisiones.
S’unda manna de Tiu Wagner ch’arrivat a dies de oe puru. Si podo iscujare sos chi non bi tenen istrumentos culturales, mi benit pius a punta assusu a iscujare a chie custos istrumentos los ada, mescamente in su 2005. Sos chi giaman “sos intellettuales”, s’intellighenzia, hana duncas culpas mannas.
Cherio fagher unas cantas dimandas a sos chi cherene rispondere. Possibile chi si devat ancora intendere chi sa limba uffizziale o culta o de sos poetes in Saldigna est semper istada su logudoresu? Custu lu podet narrer unu chi non b’est bessidu mai da idda sua o pessat chi su mundu che finat in sa laccana de sas campagnas suas ma no unu chi cheret esses pessone istudiada. Tando li naro: “Fizzu me’ faghedilu unu ziru onzi tantu, ca su mundu ch’est mannu!” atteru che intellettuale sese, pro caridade divina! E Don Baignu Pes? E Ciccheddu Mannoni? E Enea Danese? E Fra’ Antoni Maria de Esterzili? A los connoschides? A la cherimus connosches totta custa Saldigna nostra o nono?
B’amus tantas limbas in Saldigna, e tantas ricchesas, ja l’ischimus tottus, e beh faghene una raccolta de poesias o de musicas, e bi sun deghe logudoresos, unu campidanesu, unu cadduresu, unu sassaresu e cando andat bene bi ponen finas unu carlofortinu. A mi la cherides giamare democrazia custa?! Iscriene liberos e contana sa meidade e sa missa, faghene mustras e bi idides pezzi sas prendas de logudoro, ma si podet continuare oi? Abba’, b’est maliscia aberu in tottu custu!
Forsis chi sos atteros non sun saldos o no hana fattu e creadu cosas atterettantu bellas e importantes? Itte bi balanzamus a las cuare? Non semus pius poveros imbezes? Torro a narrer, a unu poverinu chi non b’hat istudiadu lu perdono puru, ma a un’intellettuale nono, ca est una culpa manna aberu. Si una cosa non bi la connosches tue non deves narrer chi non b’esistidi, o pejus puru si ischis chi est bella proitte non bi la deves diffondere e faghes connoscher a tottus sos saldos? Nd’amus idu de onzi colore pro dimostrare chi sas teorias issoro fini zustas, ziros e contrazziros de peraulas chi ponene sa zente a rier e faghen meda dannu a sa cultura nostra. Si non bi l’ischis faghes tue sa cosa, ponecche a un’atteru e liberannocche su logu! Eo so logudoresu ma si fio istadu campidanesu o cadduresu o sassaresu o itte si siada mi fio arrabiadu aberu. Anzis mi arrabio ancora e pius ca so logudoresu, ca nos faghen passare a nois comente razzistas! In ora mala!
S’ultimu cantu de s’articulu meu est dedicadu a duos mostros sacros de sa cultura salda. Happo lezzidu, bah so cambiende idea, ja boll’happo a contare un’attera ia.
