01/03/2005 A sos responsabiles de Sotziu Limba Sarda
Faeddare in sardu cun sos fizos
de Mariu Unale
A sos responsabiles de Sotziu limbasarda,
mi jamo Mariu Unale et vivo in Tzaramonte de Anglona provintzia de Tattari. Dae pagu tempus in goi apo detzisu de chircare su limbazu chi est faeddadu in bidda mia e de assentare sas paraulas chi cun su tempus modernu no semus ismentichende. No apo sa pretesa de ischire iscriere sa limba sarda ma chelzo contribuire in sa discussione ammentebos chi tantas variedades de faeddos sunt ricchesa pro tottu et no limitassione pro niunu. Una de sa primas difficultades est istadu a traduire su faeddu in iscrittura. Pruite creo chi l’ischedas s’Anglonesu si differentziat dae su Logudoresu in su sonu e in sa pronuntzia. Sa zente de idda mia iscriet duccas, in Logudoresu mentere chi deo chelzo proare cun s’Anglonesu pro istare su pius fidele possibile a sa limba mia et de cunseguentzia puru a su sonu. Su chi sighit est in Anglonesu Tzaramontesu:
Dae tempus lontanu sos mannos mios mant faeddhadu sempere in saldhu, et in saldhu apo continuadu a faeddhare a tott’oe, fintzas cun fizos mios. Ca si cherimus chi sa limba si tramandhet la devimus imparare a sas minoridades cun tottu sos usos ei sas costhumantzias de sos bisajos nostrhos. Apo imparadu s’italianu nazionale e aters limbas istrhanzas pro motivos de ischola et de trabagliu ingiantu so mastrhu de ischola de mesu minore. Pro dare rischontru pius mannu a sas tradissiones, a sas costhumantzias de iddha mia e a sa limba, apo pensadu de fagher unu situ Web de su cale bos do s’indiritzu: www.archeologosardos.it
M’apo a gloriare retzende ischrittos bostrhos a li dare pubblicassione. Cun custhu bos saludo isettendhe notiscias bostrhas. A mezus bider.
