Sa leze Rezonale n.26/97, trattat de “ Promozione e valorizzazione della cultura e della lingua della Sardegna “. A s’articùlu 1 narat giaru chi “sa Rezone de sa Sardigna leat s’identidade culturale de su populu sardu comente chi siat su primu bene de valorizzare e promuovere….e su fraigu de un’Europa chi si muntenet a subra de sas diversidades in sas culturas rezonales…”
Custos sunt sos printzipios de custa leze chi in s’articùlu n.5 prevedit unu organu chi si giamat “Osservatorio regionale per la cultura e la lingua sarda”. Custu Osservatoriu est unu organu consultivu de s’assessoradu rezonale de sa istrutzione pùbblica, devet dare parrès a subra de su “Pianu de sos interventos” comente prevedidu in s’articùlu 12 e, donzi annu, balantzare s’attividade fatta pro custos obbiettivos. B’at de narrere chi sos parrès de s’Osservatòriu, no sunt detzisivos e sa cummissione cultura, sa Giunta e su Cossizu Rezonale, podent votare comente cherent, fintzas chena los leare in cussideru. Nende custu, podimu pessare, pro faghere unu esèmpiu, a sa LSU pro sa limba unificada chi poi fit istada bocciada dae sa Cummissione cultura, dae sa Giunta e mancu passada in Cossizu Rezonale.
E tando custu osservatoriu ite bi faghet? In su bilanciu de ocannu no si deviat segare cussu chi no servit? Est comente medas organos o carrotzones rezonales chi sos sardos pagant pro los muntennere, ma chi a sa fine servint pagu o nudda! Est unu organu chena perunu valore pràticu e de cumpetentzia bera. Podimus narrere chi custu Osservatoriu, comente medas ateros organos rezonales, est frommadu pro su pius dae zente seberada e posta igue dae sas alas politicas.
Sa leze prevedit chi siat frommadu dae chimbe istudiosos de sas divescias disciplinas (Limba e Letteradura sarda, Istoria de sa Sardigna, Istoria de s’arte de sa Sardigna, Tradisciones popolares de Sardigna, Geografia e Ecologìa de Sardigna, Dirittu e lezes de sa Rezone Sarda) comente narat s’articulu 17.
Bi sunt poi unu rappresentante de onzi Universidade de Sardigna, seberadu dae sos Senados accademicos, unu “capoufficio” seberadu dae sas Sopraintendetzas, su Sopraintendente iscolasticu pro sa Sardigna (nemmancu sardu), unu “istudiosu” de sas disciplinas de s’articulu 17, comente giai nadu, seperadu dae onzi Cossizu Provintziale. E poi sighint, unu rappresentante de sa Facultade Teologica de Sardigna, su Presidente de s’IRRSAE e pro finire su Ghiadore Zenerale de s’ISRE.
In totu sunt a su mancu seighi pessonas chi diant dever’aere “curricula mannos meda” de “verificare”e chi sa Rezone pagat cun gettones de presentzia.
Una cosa de no irmentigare peroe, est chi sos cumponentes, sunt votados dae su Cossizu Rezonale e donzi ala sèberat sos rapresentantes suos. Custu chèret narrere chi sa cumpetentzia no est sa cosa pius importante , ma s’amigantzia cun unu partidu o s’ateru emmo.
Podet fintzas sutzedere tando, chi calicunu (o meda) de custos cumponentes de s’Osservatoriu, siant zente a sa cale no lis importat meda de sa cultura sarda, o de sa limba, sas tradisciones, “de tottus sos sardos”.
Chie podet assigurare a sos sardos, chi custos cumponentes ant a faghere sos sèberos pro una politica culturale de Sardigna “supra partes”? E sa limba pro custas pessonas cale posiscione occupat intra a tota sas materias de cultura sarda?
Azis ‘idu ocannu chie at seberadu sa Rezone? Su tzentrumanca (sa majorìa chi deviat faghere una politica “identitaria”) pro faghere un’esempiu, at fattu tres nùmenes.
Pro cantu spetat a sa limba, podimus narrere chi duos de custos numenes ischimu chi sunt de seguru contra, e chi no li dant valore primu pro s’identidade limbìstica sarda.
Sunt Maria Rosa Cardìa, e Paolo Francesco “Franco” Fresi, sa de tres est una sennora chi no s’ischit bene ite nde pensat. .
Maria Rosa Cardìa est professora de Istoria, e s’ala e’ manca (DS) ischint bene meda ite nde pensat de sa limba sarda, e fortzis pro cussu l’ant torrat a pònnere in s’Osservatoriu cufrimmandela.
Franco Fresi, si no bos lu ammentades, est cussu chi iscriveit, pagu tempus a como, in s’Unione Sarda, unu articùlu inue su titùlu ebbìa faghet cumprendere ite pensat: «Lingua unica per i sardi? C’è già l’italiano». E poi in s’articulu naraiat faeddende de s’italianu «Una lingua che tutti conoscono, capiscono e sanno parlare: gente di cultura e non (basta sentire come usano bene l’italiano quando hanno necessità di esprimersi e di farsi capire, i pastori di Logudoro e Barbagia, i contadini di Gallura e del Campidano, i pescatori delle aree costiere)… ».Poi sighiat a nàrrere cosas mai intesas prima. Naraiat chi sos sardos la devent finire de pretendere de faeddare in sardu a fora de sa Sardigna e contaiat unu contu chi pariat imbentadu ad “hoc”. Difatis naraiat chi sos sardos como si n’che birgonzaiant quasi, de faeddare in italianu!!???? Ma inue l’as at intesas custas cosas? E sighiat faeddende de s’italianu «la chiamano, associandola a un aggettivo tanto brutto quanto improprio, lingua altra, lingua dei padroni, lingua imparata con l’imposizione di disimparare quella nostra, dei nostri antichi padri, per questioni di potere».
Chi posca est beru puru, ma a mie no mi paret chi lu nelzat zente meda.
E galu sighiat goi e goi, nende cosas intesas dae calchi ateru intellettuale “de grido”, cosas chi issu nemmancu connoschet. Bi l’aiat contra a sa limba unificada, ma no aiat propriu cumpresu a ite servit, e comente sunt de abberu sas propostas in campu, tantu chi no s’abizaiat de sas differentzias intra s’una o s’atera.
No b’at bisonzu de iscriere ateru, pruite si cumpredet tottu.
E tando chie b’at a essere in s’Osservatoriu nou a difendere sa limba sarda? Diegu Corraine (postu dae sa Provintzia de Nùoro) e Gianfrancu Pintore (“istudiosu e espertu” e polìticu de Fortza Paris) chi posca sunt sos sostenitores pius mannos de sa LSU, chi in pagos la cherent.
No b’ant a essere rappresentantes de ateras propostas pro sa limba chi s’ant a dèvere “ufficializzare” pro sa Rezone. Ma no b’at problema, semus siguros chi cun sa gherra de “limba emmo o limba nono” e de “cale limba” s’Osservatoriu no at a aere perunu valore detzisionale e praticu.
Difatis, si custa est sa zente chi devet dare cossizos pro fraigare una “politica limbistica” e culturale pro sa Sardigna de oe, e cunvinchere s’Assessora Pilia (chi pro como no paret tzertu in favore a s’uficialidade de sa limba in Rezone e de la curriculizzare in s’iscola) paret propriu chi sos Sardos in s’Osservatoriu no ant a essere rapresentados bene nemmancu custa ‘olta pro difendere e salvare sa limba issoro.
Menzus a l’abolire s’Osservatoriu e cun su dinare respermiadu finantziare duas iscolas in pius chi insizent su sardu.
No ant valore perunu, podere perunu de detzidere. Chie cumandat est su politicu de su mamentu, cun sos “espertos” chi s’at a seberare: E cando no cumprendent o no risolvent nudda, sun pagados su mantessi cun su dinare nostru.
