|
21/03/2005 Aristanis, atòbiu de ismentigare Mensching: <Sardos, bos ispiego sa limba bostra> Sardos, no ais cumprendiu nudda de sa Limba Sarda Unificada. E no ais cumprendiu nudda mancu de su a ite servit. E si dda criticais seis pròpriu sardos malos. Ma malos de aberu. Mancu male ca at pensau de bos ispiegare totu Guido Mensching, professore de filologia romanza de sa Freien Universitat de Berlinu, chi at foeddau (totu in sardu po nàrrere sa beridade) in su cunvegnu apariciau sabadu colau in Aristanis dae s'ufitziu limbisticu provinciale. Segunde su Giornale de Sardegna de eris (artìculu firmau de Maria Obinu) s'inefabile professore teutònicu at contau a moda curiosa ca sa LSU amitet un'ùnica ortografia ma prevedit is diversidades foneticas e de pronuntzia de totu sas variadedas de sardu. Duncas, s'iscriet "betzu", ma unu de Campidanu podet lègere "becciu". Ma no est bastau. S'acadèmicu tedescu s'est atriviu a nàrrere ca no est beru ca s'istandard propostu de s'ufitziu limbìsticu nugoresu (de su cale su de Aristanis est unu "fizolu") assimizat de prus a su logudoresu, ma ca custa variedade tenet prus sonos de campidanesu e nugoresu e duncas paret gasi, ma no est. Sunt sas àteras variedades chi ant peccos. A pustis de Mensching ant pigau sa paraula Marinella Marras, Maria Cossu, Iside Zucca, Marinella Lorinczi, Diego Corraine e Mario Puddu, lassau po ùrtimu a bella posta a foeddare de Limba de Mesania. Pagu sa partecipatzione: non prus de una barantina de persones. Po prènere sa sala sos organisadores ant depiu precetare una paja de classes de iscolas. Iscarsu o nullu su dibatu comente est in sa traditzione de sos aparicios targaos LSU: ma de ite si podet dibbàtere cando si falat a unu livellu gasi de arrejonos? E sa gente ddue podet creere puru... |