Una die soberana…"saludu, saludu. Grascias sient a su
Segnore".
de Mariu Unale
Est beru chi onzi die est de Deus; pius de tottu candho b'est su saludu. Ma cussa die, de su vintunu de maslthu de su trintanoe, pariat chi cheriat immentigare totus sas ateras. Su sole fit alsthu in su chelu mandhendhe una calureddha amantiosa, chi fintzas sos puzones fint in recreu. In mesu a sas alvures fioridas e pienas de abes in trobagliu, mizas de puzones isthaiant cantendhe milli cantos: dae su rusinzolu a sas calsdhoglinas, sas sorigheddhas e su ciddhu, totu armizende a su propriu nidu, chie in sas pubuleas chie in sas mattas a segundu de sa natura issoro. Deo puru aia cumpridu sos trobaglios de su manzanu e cumpare a fizu meu, su pius mannu, mi che fia andhadu sutta a un alvure etza de chelschu, ma sempere fozida che pitzinna, a mi che passare un ischutta. Attesu s'intendhian sas boghes de su messaiu fattende su eranile pro assoliare sa terra in s'isthiu, chi poi an'haer bavatadu, a sas primas abbas pro semenare su laolszu.
-"Ah!! pupuri!!! -Olstha su ò!!!" sa cadrijas ses lassendhe?- ".
Sos tzoccos de sas bistrales, de sa zente fattende linna, pariant fusiladas abhelsthas in chelu. Unu ischimuzu a pinna de muru ti faghiat bolsthare s'oju, candho pro unu o s'ateru animale. Sa merula niedda che pighe, e su furittu catziendhe issu puru pro sos fizigheddos. Su tzilibriu sempre a briga cun calschi terrionca, si etaiat che fritza a terra subra a calschi sorighe o colora chi si fint assoliende. Gai cun sos pensamentos mios, mesu in su sole e sa conca in s'umbra, e fizu meu drommidu che un angheleddhu mi so ingalenadu sonniende a frades mios palsthidos in gherra.
-"Oh ba!!!…. Ba!!….Curride, curride a n' dhomo chi bo cheret giaja-".
Su fattu a mannu, fit isalenendhe dai sa grande curridina e chentza mi lassare mancu su tempus de m'ischidare fit palsthidu che fuette. In domo, sogra mia, tota pasida ma segura de cussu chi fit fattende mi narat a chi essire in presse a biddha, a giamare sa mama e palsthu ca Frantzischa fit a proa a s'illierare. Frantzischa, muzere mia, fit' una bella femina, no pius tantu pitzinna ma ancora in folszas, poi de chimbe fizos, e su' e ses approa a benner.
-"Ajò cun babbu. Pone sa seddha a su caddhu. Eo peristhantu mi cambio su entone-".
Su caminu andhendhe e torrendhe pariat pius longu de sa ateras bolsthas. A s'andada fizu meu a groppera, e a sa torrada invetze "mammai", e deo a pè cun su coro in bula che lepere in saccu."
-"Iperemus chi Frantzisca trattenzat!!!!…………
Dae s'aiudu e' dhomo, abbelszende sa jaga unu piantu, chi m'at beladu su coro, e unu frittu, mancarri sueradu, in sa trae de s'ischina.
-"Deu Santu e Beneittu cun totus sos Santos de su Paradisu e it' esthe-"?
-"Pregadi ene, pregadi ene ".
Sogra mia, a muncaloru in conca, cun sa falsdhitta insambenada, lesthra che lodde in fua, mi ponzeidi unu pannu e lana totu ammorotuladu in bratzos.
-"Bae affaca de sa fogulaija e bettali sa fressada".
E in d'unu e in tantu, umpare a "mammai" ch'intreit in s'appusentu. Fia a tremuledda ischovachendhe cussu pannu, ca una carighedda ancora biajta e fadigada cun sos ojos ancora tancados s'accereidi a fora. Un atera grascia de su Segnore s' aggiungheidi a sa familia.
-"Essi unu cicchette a babbu fizu me!!!! "........... "E bufadilu tue puru, chi como ses già mannittu"!! -Totu a un' intasada pro mi toccare su coro e un ateru a li leare sabore-.
-"Pregadi ene, pregadi ene- "
Sogra mia accerada in sa janna de s'appusentu, jughiat un ateru pannu ammorotuladu cun d'una cuntentesa chi su risu de sa ucca tota isdentigada l'andaiat da un'orija a s'atera; sa falsdhitta piena e sambene comente chi esseret isthada isthellendhe.
-"Sos fizos sunt grascias de Deus, e cun d'unu mascittu b'aiat puru una femineddha ".
No ischia a riere o a pianghere, e in pag'ora totta sa pinnetta si fit pienada de sos ateros fizos allegros che cicciri currende intundu a sa fogulaia e riende.
-"Pone un ateru cichette a babbu fizza mi!!!!.Qusthu no est dolu!!Est cuntentesa! "-
Dai su ighinu fint bennidos a visita, e sos isthranzos sunt sempre sos benennidos.
-"A chentu, a chentu!!! Dies comente e oe, cun saludu e cuntentesa".-
Sa suffatta fit piena de caligheddos boidos, ma sos pius, pienos, e andaiat e torraiat dae intro a fora e poi torra a intro.
-"Saludu compa!! A los bider mannos, cojuados e affizados!! Saludu, saludu.
-"Aioe, truva a intro a s'appusentu cun totus sos pitzinnos"-mi narat sogra.
In d'unu e in tantu totus sos pius mannitos inghiriados, e sos pius minores subra, in pes de lettu, e Frantzisca totta bella ipizada e profumada cun duas animeddhas attaccadas in titta suende, e drommidas che duas paschareddhas. Deo mi sentia subra a sas nues pro sa cuntentesa, ancora cun d'unu caligheddu in manu guasi boidu.
-"Frantzì gia mi l'as fatta simprovvisada!!!" -
Frantzisca juighiat una cara bianca ruja, che pitzinna in fiore: gia fit bella muzere mia, m'aiat a su mamentu risparmiadu trabagliu pro fagher fizos a unu a unu. Fora aiant comintzadu a ballare su ballu tundhu a sonette e sas suffattas andhaiant da intro a fora tottas pienas de caligheddos cale boidos cale pienos.
-"Saludu, saludu!!!". Su sole si che fit caladu e sa die fit intirinendhe, sos puzoneddhos si fint preparandhe a che passare sa notte e deo puru istraccu mi so etadu in sa odijeddha a pè de sa fogulaia, puru ca sa conca mi pariat un bugnu de abe. Ite die soberana.
Mariu Unale de Tzaramonte
Sa die undhighi de su mese de malsthu de duamizaechimbe.
