|
09/03/2005 Parres liberos In sardu e de sardu de Manuela Mereu In sardu e de sardu, po chie at piaghere a su tema, si nde est intendende chistionare meda in custa muta. Sos atóbios e sos convegnos chi cherent agiudare a dare valore a su sardu sunt semper de prus. Su 25 de Freàrgiu in Casteddu est istétiu presentau a su púbblicu "Su Mundu diplomàticu", bortadura a sardu de su giornale francesu connottu meda in tottu su mundu, chi cheret dare unu valore de in prus a sa limba sarda bortande sos artículos de prus importu de su giornale finas in sardu, chi in paris cun su catalanu, sunt sas únicas duas limbas de minoria chi sunt arrennessias in sa pubblicazione de custu giornale. Allegas bellas sunt arribadas a su diretore editoriale de custu giornale (si podet agatare insa reza ebbia, finas si sos bortadores isperant de lu podet istampare) chi est finas su diretore de s'Uffìtziu Limba Sarda de sa Provìntzia de Nùgoro, Diego Corraine. Las ant nadas Manunta, Cocco, Loi e Ragozzino: ca s'idea de poder bíere iscritas in sardu sas pàginas de custu giornale est unu vantu po sa limba nostra. Pero, comente in tottu sos atóbios chi ciarrant de sardu bi est una dimanda chi tottu sa gente s'at a pònnere: cale sardu? Chie connoschet s'Uffìtziu Limba Sarda e su diretore suo ischit bene ca semos chistionande de LSU, de Limba Sarda Unificada. Ma custu tema in s'atóbiu de Casteddu no at tentu peruna discussione, est istétiu acinnau ebbia, comente chi èsseret normale a ciarrare de LSU e non de Logudoresu o Campidanesu o de Limba de Mesania. "Meglio non svegliare il can che dorme" at àere pensau calincunu, ismentigande però ca sa gente si at interesse a crachi cosa cricat de si informare e de connossere tottu su chi est possibile. Po su Prof. Loi a sa gente non nde li importat nudda de LSU o de Mesania: "Sa sfida chi teneus nos est de da chistionai custa limba. Nos eus imparau s'italianu struppiendeddu, aicci depeus fàiri po su sardu. Depeus imparai a du apreziai po su sentidu chi tenet". A mimi puru mi paret chi custu siat giustu: la depimos ciarrare custa limba, ma sa gente depet iscire puru ite s'est faghende a livellu de política linguística, a livellu istituzionale. E innoghe arribamos a su dolu mannu. Apo assístiu a un'àteru atóbiu aunca s'est ciarrau de sardu. Custa borta in Sorgono e cun s'interventu de s'Assessora a s'imparu púbblicu. Su sentimentu est su própriu de cada atóbiu: sas allegas aggradant a tottus ma sas cosas pràticas non meda e cada unu faghet a manera sua, tantu si non bi est nisciunu chi ponet su frenu si podet fàghere tottu. Mi isvetavo crachi cosa de prus càpia dae un assessore de sa Regione e inveces, comente est arresciurtau finas a oe, no apo cumpresu nudda de cussu chi sa Regione cheret fàghere po su sardu. A nàrrere sa beru, apo cumpresu una cosa ebbia: cussu chi sa Regione non cheret fàghere. "Imporre il sardo nelle scuole non sarà certo un compito di cui la Regione si farà carico, tanto più che non è possibile interferire con l'autonomia scolastica". Pagu prus a mancu sonant gosi sas allegas de s'assessora. E in prus m'est partu (ma custu est unu pensamentu meu) ca sa connossenzia de su problema de sa limba sarda e cussu de agatare sas maneras po li dare su valore chi li deghet siat pagu meda. |