19/03/2005 Arresessia sa maniFESTAtzione anti-taglios
Limba, sa die de s’orgolliu
de Peppe Corongiu
Làstima po chie no ddue est benniu e at perdiu s’ocasione po fàere un’atu pretzisu in vida sua. E at fatu male poite sa manifestatzione de chenabura 18 est arresessia bene. Belle treghentos pessones pinnigadas a pare suta is fentanas de su Cunsillu Regionale po pedire dignidade po sa cultura sarda. Rapresentantes de su mundu de sa limba, de sas traditziones populares, grupos de mùsica etnica, poetas, cantadores, bandas musicales, editores minores. Totus unios, po una die, contras a sos taglios propostos dae sa Giunta Regionale cun sa lege de Bilanciu 2005. Taglios ingiustos: totu sos setores culturales segaos de su 20%, mentras sa cultura sarda truncada de su 60 %. (E in calincunu tretu de su 90%). Su chi est arresurtau a sa fine est una bona arresessida de comunicatzione: po una die sa cultura sarda est intrada in s’agenda de sa polìtica regionale e in sos gazetinos de sa televisione in primu gradu. Po biere si aus a balangiare in cuncretu e ant a torrare a amerare sos capìtulos de bilanciu tocat a isetare. Sena bisos, ca s’impleu est tostu. Non fut una cosa facile a apariciare sa manifestatzione “Po èssere nos etotu – Festa de sardos”. Proite a intro ‘e chida fut malu a fàere atobiare gente cando si triballat. Proite su movimentu de sa limba est partziu in alas in gherra. Poite po annos e annos s’est seberau de mumificare sa limba in cunvegneddos prenos de pruine e de professorones sena prus faeddare cun sa gente. Poite s’est fata batalla comuna cun sos grupos de ballu, tenores, coros, bandas, cantadores e sonadores chi calincunu crisaiat comente si non fatzant “identidade” issos puru. Poite totus morrungiant, ma nemos si ponet a organisare e a si nche esponnere in prima pessone. A fronte parau. Sena timire. E sena criticare chie faet ponendo a campu de su suo. Chi siant ideas o dinare.
Istrisciones, cartellos befianos, volantinos e pandelas sardas ant cundiu sa festa paris cun mùsica, cantos e ballos. Su Sòtziu Limba Sarda, chi s’est prestau cun ispìritu de servitziu a coordinare sa die, at fatu fintzas s’interru de sa limba sarda. A brulla, po riere, ma fintzas pensando chi podet capitare puru si is chi guvernant non cambiant passu. Perunu comitziu, peruna parlata. No ddue iat bisongiu. Sa retòrica est abbarrada in fora.
Gente meda de Casteddu chi fut colando s’est frimmada. At letu, pregontau, s’est informada. E at ballau paris cun is grupos de ballu e is àteros amigos chi s’ant fatu s’onore de èssere presentes. Onorevoles de su Consillu ant isconchiau e si sunt fatos biere. Paolo Pisu, consilleri de Rifondatzione e sìndigu de Làconi, s’at fatu una dantza cun praghere e gosu. Televisiones e giornales ant fatu su devere insoro. E gasi politzia e carabbineris chi nos ant bardau cun cumpetentzia, professionalidade e simpatia.
A sa fine de sa mangianada, unos cantos capugrupos nos ant arretziu. Un’ora cumpria de arrejonos a subra de sas chistiones prus de importu. Ddue furint presentes Gianluigi Gessa (Progetto Sardegna), Adriano Salis (Italia dei Valori), Paolo Pisu (Rifondazione Comunista), Attilio Dedoni (Riformatori), Mario Diana (Aleanza Nazionale), Salvatorangelo Cucca (Margherita), Uccio Cappai (Udc), Peppino Pirisi (DS), Beniamino Scarpa (Psd’az). Sunt istaos bogaos a craru dae sa delegatzione de sos manifestantes datos de bilanciu, propostas e parres diversos de cussos de sa Giunta Regionale.
Ddue at istaos impostas bastantes de impignu e voluntade po chircare de torrare a pònnere dinare mancari leandudeddu a chie nd’at tentu sèmpere meda comente su Treatu Lìricu de Casteddu o su mundu de su Jazz. In prus s’est foeddau de chircare de fàere intrare sa limba sarda puru in su dinare europeu de is POR e de presentare documentos a sa cummissione Cultura e Deretos Civiles. No ddue at de si fàere meda illusos. Promintere e non giare giai costat pagu. Ma aus a biere ite a sutzedere in Consillu custas dies. Bos aus a mantennere informaos.
