Arretratu lestru de sos partidos natzionalitarios de Sardinnia. Una làstima. Pratzios a manca e a dereta e discapassos de criare unu fronte aunidu. Vitimas de su bipolarismu magioritàriu sena ispera de si nde pesare dae su pruine.
Gavino Sale bene in sos medios massivos, ma galu sena programa polìticu e crasse ghiadora. Sardigna Natzione gosi e gosi: bravos pitzinnos sena fortza polìtica. Fortza Paris sèmpere in chirca de logos de podere, presidentzias e assessoraos. Sardistas, desaparecidos. Uds, partidu natzionalitariu sena motivu po dd’èssere. Partidu Sardu, galu in chirca de una singia polìtica e de una bisione manna e generale de sa polìtica sarda a pustis de su 1989.
Bene at fatu su Partidu Sardu a non fàere s’alliantzia a cumone cun Renato Soru in is eletziones de su 2004. Mancari dd’apat pagau a dinare mannu. In custos meses est bessiu a pigiu po totus comente sa polìtica de su Tzentrumanca ispirada dae sos inteletuales feniciones siat contras a sa limba e sa s’identidade sarda. Ma su masochismu non tenet mai limide. Nostamis su contu pagau a is regionales, como su partidu sardu s’alleat a cuddos partidos chi in sa Regione sunt segando limba, cultura e identidade. A banda sa necessidade de agatare sa cadrea a calencunu, ddue podet àere àteros motivos po custa masochistica alliantzia? S’at a liberare mai su partidu sardu de sa sudditzantzia psicològica chi sunfrint cun sa Manca sarda?
O dd’ant a cumprèndere a in antis sos àteros partidos. S’Irs, cun sa valentia in sa domo de Berlusca, at fatu una faina mediàtica de gabale. Gavino Sale peroe boghet a fora sos programas e sa crasse ghiadora. Su bolu mediàticu no est bastante po criare una fortza chi nde fatat pesare sa Sardinnia dae terra.
