Dadu chi so semper zirende iscultende a custe e a cudde faeddende de limba salda in tottue, in convegnos e in manifestaziones varias, mi so pessadu custas dies un'alticuleddu. Millu inoghe.
A las azis presentes cuddas pubblicaziones "Italiano per stranieri" e bai sighinde? Como ana fattu su "Saldu for foreigners" puru. Non bi creides?! Eppuru est veru.
Bi so andadu eo puru s'attera die a Aristanis a iscultare a su famadu Prof. Mensching faeddende de limba salda, anzis de limba salda unificada pro menzus narrer, ca est diventadu espertu de cussa iscola e pensieru. Relazione illuminante su professò! Tando so deo chi no haio cumpresu bene sa portada istorica e su veru significadu de sa lsu! Ah! Ecco su proitte! Mea culpa! Proitte devides ischire chi sa lsu lassat liberu onzunu de legges comente cheret, mancari iscrittu pro tottus a sa mattessi manera. Est pro cussu chi tottus la cumprendene sa lsu! Duncas si deo iscrio "chimbe" unu campidanesu podet legges tranquillamente "cincu" itte bi cheret?! Unu triplu saltu moltale m'azis a narrer bois, nono!, bos rispondo eo, sas deghe lezzes de su Prof. Mensching! Emmo, proitte su professore nostru ch'hat bogadu a campu deghe reguleddas chi nacchi nos faghene legger sa lsu a sa campidanesa, comente si fettat in concretu però solu isse l'ischit, ca non nos hat nadu cales fini custas regulas, chircadebollas!
Ai bi so restadu mì! Ma non fit galu finida. Custa cosa chi nana chi sa lsu siet logudoresu ischiettu, no est vera mancu pro nudda. Est ca sas atteras variantes hana mancu sonos de su logudoresu e duncas hat toccadu a la faghes propriu ai sa proposta, ma no est fattu pro su malu no! Li assimizzat a su logudoresu ma no est logudoresu logudoresu. Boh!, hat a esser bai tando, miraculos de s'iscienzia! Como iscoberimus chi est una mediazione limbistica, copiende sas ideas anzenas, ello!, tra logudoresu e nugoresu!
Duas peraulas pro s'onestade intellettuale e sa correttezza, aberu elegante, de sos organizzadores, su manifestu iscrittu tottu in lsu, e custu si podet cumprendes puru, ma s'unicu istranzu ammessu de s'attera palte, namus bai, Mariu Puddu, postu a ultimu chene titulos nen nudda, nemmancu esseret istadu su piseddu de sas commissiones, si fit istadu possibile che l'aian postu in d'unu fogliu a banda.
Sos politicos si che sun fattos sa passerella issoro e posca tottus a ristorante felizes e cuntentos, itte bellas chi sun sa democrazia e s'iscienzia!
Ma torremas a su saldu for foreigners. A la narres totta, cherio iscriere sa "limba e sa bagassa" comente nana sos amigos meos de campidanu, chi non cheret narrer chi siet sa limba de cuddas signorinas, ma imbezes chi tottus si creen sos padronos de custa limba. Pro rispettu a sos istranzos chi faghene e ana fattu ai meda pro sa limba nostra, e chi nos faghen semper simpatia, mi so limitadu. Ma sigomente nois saldos pro sa limba nostra tempus non nd'amus, ca devimus pessare a sos grandes temas de s'umanidade e no a cosigheddas de limba, como si nde occupana sos istranzos, medas lu faghen bene, atteros nana su chi nana. E bai ispiegana a sos saldos comente diat dever esser sa limba salda, cando non si la faghene a contu issoro sa limba, saldu for foreigners appuntu, chi no est saldu saldu, pro sos saldos mì, nono!, est un'attera cosa! roba de iscienziados, itte nde cherides cumprender bois!
E como, in culzu, sas cautelas democraticas, pro non perder s'ottimismu! Atteru convegnu, si presentat unu liberu in saldu. Bene pesso deo, bi tucco, e imbezes male happo fattu! ja b'hat pessadu sa cussizzera rezonale a mi iscaddare bene bene! Presentana su liberu e appoi lea sa peraula sa cussizzera e nos dada a ischire chi su saldu cheret valorizzadu, comente faghet issa faeddende semper in italianu, chi su guvernu saldu ja si nd'est interessende, pessende de lumenare una commissione de espertos o una cosa ai, pro nd'arrejonare e approfondire tottas sas chistiones, chi b'hat fentas lezzes como e si podian formare sos zovanos pro tribagliare chin su saldu ecc. ecc. Ma chi a narrer sa zusta, issa no est meda de accordu a che ponner su saldu in sas iscolas, ca bisonzat a agattare sa manera zusta, e innantis bisonzat a formare sos professores, e bisonzat a rispettare tottas sas variantes puru, ca si nono si faddimus como e beh tando pro su saldu si ponet male aberu e duncas devimus istudiare bene ancora, a bies comente si podet faghere, ca sos piseddos non bi la deven bies comente una cosa folzada o in pius e bai sighinde. Itte li cherides narrer bois a una cussizzera oi?! O sa cussizzè ma inue che fisi in custos ultimos trint'annos?! Mì ca sezis nende semper sa mattessi cosa! Eo non naro de esser dizunos de su dibattitu ma oi est troppu aberu, fentas pro sos passenziosos! E mescamente pro unu politicu e itt'ora bona! Ma tottas custas bellas cautelas democraticas, solu pro su saldu che bessini a campu? Ma cando hamus fattu latinu e gregu in sos liceos nostros itte nos hana dimandadu prima a bier si lu cheriamus istudiare, o nos ana passadu calchi questionariu a ischire si nos piaghiat sa filosofia?! Nolla semus agattada incue e leada noll'amus, comente fidi, fidi. E a sos mastros de istoria comente los ana formados? Che los ana zaccados in sas iscolas e bai ana imparadu, insegnende sul campo, pro su saldu però no andat bene, bi cheret attera formazione, laurea, ispecializzazione, master non bastana, troppu bellu diat esser!, nono, bi nde cheret galu, annos e annos, cantos non s'ischit, tantos a sa segura. E bisonzat a buscare sa manera zusta, non s'ischit mai, calchi famiglia, o calchi piseddu si diat poder offender o bi podet restare male, si b'est su saldu in sas iscolas saldas. E si calegunu legget un'alticulu in saldu in sos zornales su mattessi, emoziones troppu foltes si bi poden iscadenare in sos animos de zeltos zovanos, menzus aisettare, buscare su modu pius adattu, pro non faddire. E bai, aisettende aisettende, in cherta e sa manera zusta, saldu non bi nde faghene in neddue, nen in sas iscolas e nen in sos zornales e semus arrivende guasi guasi a sa discriminazione e a su razzismu contras a sa limba. Esazerende so? E tando abbaidade cantu saldu b'hat in sos medios rezonales e torrademi s'imposta, so inoghe. Chin sa cussizzera nos bidimus tra trint'annos pro nos narrer semper sa mattessi cosa e chene fagher mai nudda, ma tando saldu non bi nd'hat aes pius, e bai nocche semus cazzados su pessamentu.
Una cosa bona però la devo narrer pro la finire chin ottimismu. Allunessi como ischimus proitte non bi insegnana sa limba salda in sas iscolas rezonales, pro una cautela democratica, pro unu "eccesso di zelo", como l'ischides bois puru. Si bos dimandana rispondedeli ai. Comente mai non bi nde faghen limba salda in sas iscolas? Pro una cautela democratica, pro unu eccesso di zelo. E in sos zornales e in sas televisiones? Su mattessi, sempes pro una cautela democratica, unu eccesso di zelo. Pro no offender a neune.
Como l'ischimus. E basta chin sas lamentas.
Comente semus democraticos nois sardos balla, non bi nd'hat atteros!
