Ammentos mi sunt bochende, de mannos disizos, de torrare pissegusu in sos annos, cando fizu minore, babbu mi jughiat a tribagliare in sas tancas nosthras e in sas anzenas.
- Bae!!!Fizu me!!…..falache erettu, riu riu, e pigaminde duas bestigas de ozasthru …..Si no bi’n d’at, lealas mancarri de ru!!!, chi mi devo fagher sos amentos noos e i sa sesuja-. M’intraiat su frittu in sa trae e’ s’ischina cando intendia a babbu fentomende sa sesuja……………s’idet chi deviaimus ipedrigare, ossiat a che ogare tottus cussas pedras mannas, ca sa tanca chi aimus pag’ora laoradu fit totta a cadrijas. A purpurinu e a ipanu los aia iscappados in sa tanca e josso in ue dae pagu n’d’aiumus frullanadu sa ferraina.
In sa chea de sas luzanas mi fia arressu unu pagareddhu, a leare una uccada de abba dai sa ena sutta su roccalszu, ca pruite jampende su riu, dae sutta una pedra nd’aiat bessidu una pibera de abba, sulende che allutta chi m’aiat assusthadu.
Bainzu, frade meu de unu ladu, acceradu a sa punta de sa domo fit a burrighinos…..-Aioh!!!! A ti moves ….a n’ de la pesas cussas bottes dae terra-. Babbu mi cheriat bene ma pariat chi pro Ainzu aiat unu alenu più bonu; est beru chi fit più mannu e li daiat su cumandu in paritzas cosas.
Gai cun sos pessamentos mios e sas bestigas a trasjnone, lassende in su piuer e’ su caminu, istigas de coloras (ca eo non la timo sas coloras), intendei totus sas baccas ruilende intundu a una upa ischura chi no podio connoschere ite fit. Deu Santu de sos chelos beneittu!!!!! Ma cussa est rundinina corcada in terra a ruilos issa puru piena sa ucca de bavatza bianca, e s’oiu imbidradu. – Oh Ba!!!! Ba!!!! Curride curride chi rundinina est molszende!!- Duas lagrimas cantu su poddighe mi ch’esseint dai sos ojos,…… ateru che colora!! – Ohi ite assusthu mannu si si che morit rundinina, ai ite dolu e ite dannu, dai ghi s’annada fit puru mala.
Babbu pasidu pasidu cun su bonette appena casaladu e guasi riende :- Apalsthadi fizu chi oe non c’at morte ma solu creschimoniju-. S’alenu min ch’è torreit a coro subìtu. E ite cuntentesa dae una, como fint duas…… cun su tempus sos bitellos gia creschent, e ite l’apo a jamare?…- Oh Ai!!! E ite lu jamo su itelleddhu? – “Mandiga cando n’d’as”- e ite lu cheres jamare!!!!! Aioh!! a n’de lo pesas cussos pes dae terra? Intro in sa pinneta jaja aiat polsthu su labiolu a caddu a sa tripide, pro jagare su latte, e in sa faddhija, unu tianeddhu chenza inghijadu a isjolver duos bicculos de lalsdhu pro fagher sa bagna. Ite sabore bellu chi aiat sa elsdha calsdha calsdha, cun su pane de triguindia assadu. -Te fizu me!! Mandiga e faghedi folsthe, per isthantu andha e da una chindhulada a sa figheddhas a moddhe in sa mulsza-. Sa tina cun sas figheddhas che fint in s’apusentu : a drestha intrendhe bi fint sos carradellos de su inu, e in su chizolu una giorra manna cun s’olia de cunfettu e subra, aintro un’atziu unu cadinu cun s’abba de buffare.- Como mi buffo un upu de abba ona de ena, mancarri duos, e daboi ando a sue Ainzu. Babbu cun d’unu carruzu attacadu a unu ju chi ogaiat sa pedras mannas e Bainzu fattu fattu cun d’unu ateru ju fit bavatendhe su eranile chi aimus preparadu in abrile.
-Torra purpurì – non d’as gana oe!!!! – Ipanu si!!!, chi est seriu e forte!!!!!- Ahh! Su O’!!!!!- Ainzu si creiat imposthanziosu a segunda de sos ticchirrios e a sos coppos de su fuette chi tzoccaiat che tronos cun raios de bulvera allutta. Eo fia tzappifattendhe e che carraija sa pedras pius minoreddhas: -Aijahhh!! Oi mama mia!!!! Inbenujadu aggogliendene una pius manna de pedra attalszina m’aiat trappadu su poddhighe:- Bai!!… O Ai!!!… curre… curre chi m’est bessende su sambene, bae e agogli unu bujinaghe!!! Cale bujinaghe, essi innoghe a babbu, sa ratzigadura de sa colszola de sa chessa ti faghet bene su matessi, …pius dei gussu-. Eo fia addholimadu: sa veridade no est chi mi faghiat più male de tantu, ma sos carignos de babbu mi piaghiant meda dae cando mama, duos annos primu si che fit molstha de dolore de colsthazu. – Como t’isthanzat su sambene e a crasa est totu cujadu-. Baediche a sue tiu tou chi est fattendhe s’aradu a linna e pasadi. –Nebò!!!! E ite as apidu? Giughes una cara in colore e chera!!- Tì!!…. mi so bisesthradu, ma ti poto agiuare cun sa manu sana…..-Apporrimi s’asciolu chi devo cumprire un’ ilstheva, s’ipada l’apo gia cumprida e pro su entale apo usadu su etzu chi aimus dai pius de deghe annos!!!!…… como ozastros gai onos non si agata pius. – Lea e zaccamiche sa cabija in su timone e poi sezit in su banchittu a abbaidare su trobagliu de tiu.
Mariu Unale de Tzaramonte
Su tres de Malsthu de su duamizaechimbe
Daboi de s’ischrittu : pensendhe de bos fagher piaghere bo mandho culsthu iscrhittu e una fotografia de iddha mia. Ateros iscrhittos, costhumantzias , isthoria e cosas antigas medas sunt in su situ www.archeologosardos.it
