"S'Iscolastica cun sas chistiones suas,
sa Teolozia cun sas allegas arcanas,
s'Astrolozia goi manna e difficultosa
non sunt ateru chi zogos de piloccos, cunfrontadas a s'Alchimia"
(A.Poisson, Theories et symboles des alchimistes, Paris, Chacornac, 1891, p.7)
Sardos istae cuntentos: sezis feminas e omines particulares! A bois pertocat su donu mannu de sa Perda Filosofale nova ! No, non cussa chi podet mudare cada metallu in oro. No, menzus galu. Bois tenies in donu sa capassidade de mudare sas allegas cumente bos parede, podies manizare sos faeddos cumente bos zirada, leghere a boghe arta cussu chi non b'est iscritu in perunu logu !! Est carchi cosa chi est de prus de s'Inzennieria Limbistica o de calesisiada chistione epistemolozica : est Alchimia limpia! Bois sezis sos meres de sa Perda Filosofale Nova! No mi credies? Ma non so solu ego chi bos nao custas cosas, non so solu! B'at fintzas su Prof. Mensching (mancari si no apo galu cumpresu cumente si leghede) chi nos contada de custu donu mannu.
Un'amigu m'at nau: "Mira ca l'apo ascurtau in Oristanis e m'at ispantau! Est una pessone chi po difendere sa Leze de sa LSU at propostu s'Anarchia Limbistica! A narrere sa beridade medas sunt abarraos de abberu ingaddinaos dae cussa cuntraddissione: cumente! semus ponende sas regulas a sa limba e po las faghere balere namus chi non depent essere rispettadas? Emmo. Sa regula est CHIMBE ma podes leghere CINCU o SENC o su chi ti zirada e colada in conca, ca cussas macras nieddas chi agatas in sos paperis, sunt postas gai, a fainu. E s'allega BETZU si podede leghere BECCIU o BETHU?. Mah! S'eccetzione fata a regula."
Gai at pessau s'amigu meu a boghe arta, ma ego l'apo truncau: " Poverittu!
Mensching-neddu! Tue no as galu cumpresu sa ortza de sa Perda Filosofale
nova! Nois podimus totu : tue iscries A MEZUS BIDER e sos sardos cun
su donu mannu de sa Perda Filosofale ant a leghere A MENZUS BIERE
o A MELLUS BIRI o A SI BIRI. Simple no ? Ses cumbintu como chi nois
Sardos tenimus su donu mannu de mudare sas allegas? Emmo ? E tando
bastu cun custas peleas de LSU! Bastu! Nde podimus faghere a mancu!
Dae cras totus nois amus a sighire a iscriere in Italianu, ma grassias
a su donu mannu chi Mesching nos at nau chi tenimus nois Sardos, dae
cras, bellu meu, amus a iscriere MAIALETTO ma cun orgolliu e afutidura
sarda, grassias a sa Perda nostra, amus a leghere PORCHEDDU o PROCEDDU
o su chi nos paret !!!! Ohi, ite cosa bella s'Alchimia!
