Presidente Soru istimadu, assessore Pilia, e totu sos amministradores de sa zente sarda.
Bois m'azis nadu, in campagna eletorale, chi sa créschida economica de una zente andat impare cun sa créschida curturale sua.
M'azis cumbintu a bos votare nèndemi chi su tempus benidore de sos sardos fit in su ismanniamentu de su siddadu de sa curtura sua, e duncas de sa limba, chi est sa parte piús manna de custa curtura.
Apo pensadu chi ischiazis chi sa limba de s'identidade de sa zente nostra est sa limba sarda, gai comente est fintzas nadu in una lege regionale; sa mantessi chi narat chi sa regione depet pònnere dinari pro ajuare sa limba a si nde torrare arritzare e a leare cuddu logu chi li cumpetet in sas relatas de sa zente sarda.
Como, addolumannu meu, mi so abbizende chi bos nde fizis ismentigados o no aiazis postu aficu meda nemmancu a su chi fizis prumitende, ca a mie mi paret, abbaidende a sas fainas bostras chi a su faeddare non siant sighende su fàghere.
Mi sezis nende chi b'at cosas piús aficu chi apretant su fainare bostru.
Paret chi b'apet semper carchi cosa de piús aficu chi impedit sa crèschida curturale de sa zente.
Est beru chi a mata bóida neune rajonat cun cabu, e est giustu de pensare prima a su mandigu; ma sos sardos non sunt gai matibbóidos comente sezis pensende; simmai sunt chena trabàgliu.
E su trabagliu bois nachi nos l'aiazis dadu creschende su muntone de su dinari de pònnere a sa curtura.
E inue est cussu muntone de su dinari?
Bos sezis meledados? Como forsis sezis pensende chi sa limba sarda già podet cabulare a sa sola? chi bi la fatat a bìnchere sa batalla sua chena sàmbene in sa benas! chi già b'at semper zente maca chi traballat pro amore e pro mannosia! Bois cherides chi sa limba sarda andet addaianti sa sola povera che unu pedidore, cando totus sas àteras limbas, in sardigna puru, benint garrigadas de dinari, e non penso solu a s'italianu, ma fintzas a sas àteras limbas de sas cales bois nades chi amus bisonzu pro nos mezorare.
Nois sardos si amus unu fàmine, cussu est unu fàmine chi pertocat a sa conca. Est fàmine de cosas noas, de connoschèntzia de su presente comente de su passadu. Amus fàmine de sas cosas chi nos sunt istadas semper negadas pro timoria chi nos esseremus abbistos chi non semus propriu cussa zente chena istoria e chena curtura e chena limba chi non ant semper fatu a crèere. E custu est unu fàmine chi cheret atatadu in su presente. No est piús tempus de aisetos.
Apo crétidu chi bois già l'ischiazis chi pro cuntentare custu aisetu chi semus mentovende, chi custu mezoru chi sa zente sarda aisetat, no podet bènnere a sa sola, chi a s'imbesse apat bisonzu de una sighida politica de investimentos, gai comente onz'atera faina chi pertocat a s'economia.
Non creo chi bos aisetades dae sa curtura unu miraculu economicu totu sardu chena pònnere unu centesimu in trastos e fainas! A sa curtura bi li cheret dinari, comente calesisiat àtera cosa, pro chi potat rèndere e creare richesa.
Bi cheret su dinari pro fàghere sa diferentzia tra su prumissa e sa faina.
Non torredas a fàghere s'isbagliu de sos antepassados nostros e de sas amministratziones chi nos ant guvernadu prima de a bois. Sos ghiadores de s'era de sos miraculos che ant fuliadu sa limba issoro in nòmine de unu progressu chi no amus mai bidu, ca creiant chi su proghessu fit solu in sa connoschèntzia de sa limba istatale e in su israighinamentu de s'identidade nostra. Non fatedas bois puru sa farta de pensare chi dadu chi amus una limba istatale cussa bastet puru pro atatare sos sardos, e chi non b'apat bisonzu de ischire àteru. No est gai. No est istadu mai gai e mai l'at a èssere in su tempus benidore.
Gai comente ispero chi non cretedas bois puru, chi bastet duas limbas ( italianu e inglesu) a coromare su bisonzu linguisticu de unu sardu. Creo chi su ischire tres limbas siat menzus de nde ischire duas e creo chi siat su sardu sa limba de s'identidade de sos sardos.
Non so nende chi unu chi impitat sa limba italiana non siat sardu; ma su faeddare, su iscriere, su pensare in sardu est unu sinnu de identidade chi nos marcat piús a fundu de onz'àtera cosa.
Sa limba nos distinghet in unu tempus inue sa diversidade, francu a nàrrere su cuntràriu cando si faeddat in pubblicu, paret benzende a èssere unu pecadu, e nos diant chèrrere totu chepare che fatos a istampu.
Diat èssere menzus chi custa amministrascione lasset sas trampas e faeddet giaru, e chi non tratet sa limba sarda comente onz'ateru argumentu e faina chi isboligat; ma chi apat a s'imbesse una abbaidada piús atenta chi sa limba est su sinnu piús mannu de s'identidade sarda.
Eo so contra sa dominatziones linguisticas e curturales chi che ispeigant totus sas curturas minores in nomine de sa libbertade de su piús forte. Sa limba mi serbit pro mi sentire libberu, pro mi ammentare die cun die chi semus una zenia; inue sa zenia est richesa non povertade de ispiritu.
Su trabagliare cun issa e pro a issa est unu investimentu pro su tempus benidore, e sos trastos non li depent mai mancare.
Già l'isco chi onzunu tirat a su suo, ma unu politicu depet tirare a sa cumbenièntzia politica.
Eo creo chi oe bi siat cumbenièntzia politica a amparare e ismanniare sa limba sarda.
Bois, non lu creides?
Faghidemilu a ischire si no est gai e già nd'apo a tènnere contu a tempus suo.
Si est beru chi una amministrascione depet abbaidare a su bilanciu economicu e a fàghere a torrare sos contos, s'amministradore politicu depet fàghere un'àteru bilanciu: cussu politicu e sotziale. Su riconnoschimentu de sa limba sarda comente sa limba de sos sardos, istabbilida dae una lege regionale, e fintzas dae una istatale, e dae sas diretivas europeas in favore de sa minorias e de multilinguismu, non depent abbarrare paràulas bóidas, ca sa regione est apreta dae àteros bisonzos e non finantziat sas leges suas mantessi, o las finantziat a conca sua chena isperiare meda a s'aisetu de chie fainat già pro sa curtura, o de chie s'est atrintzadu pro fainare.
Eo non naro chi su dinari a sa limba andent a dolu de àteros aerzos curturales. Ma cando bois chircades de isminuire sa chistione, leende sa limba sarda comente unu argumentu de una minoria penosa chi abbaidat nustalgica solu a su tempus passadu, e proades a nos dare unu cuntentinu cun paritzos soddos dados a limòsina, non sezis fatende una faina politica de giudu. E sezis traighende cuddas prumissas chi aiazis fatu in tempus eletorale e pro su cale bos apo votadu, pro non mentovare sos inditos europeos chi pedint a sos istados de dare ajudu a sa creschida de totu sas limbas, piús e piús a cussas chi non sunt istatales, ca custas servint a sa richesa de tota sa zenia umana.
Sos chi impitant sa limba sarda no sunt una minoria penosa e nustalgica, comente calecunu pensat, semus s'atza acuta de sos piús de sa zente sarda chi si sentit traita dae s'irmiseriamentu de s'identidade sua. Non cretedas chi siemus in pagos, e su bisonzu de connòschere sa limba nostra, in calesisiat fromma e sustàntzia, est mannu de abberu. No est dinari frundidu a s'ae su chi depides pònnere a sa limba.
Dade cara a custa cosa: sa limba sarda est de sas limbas minores europeas sa piús faeddada, su chi faghimus in Sardigna est de esèmpiu a sos àteros, siat in su malu che in su bonu.
