24/02/2005 Parres - No b'at limba chena Indipendentzia
"Sa paristoria de su coloru"
de Malcu Ozzanu
Chi s'Amministratzione Regionale noa seghet sos finantziamentos a Limba e Cultura est una desillusione solu po' una paja de ingenuos chi b'an crettidu e los an votados. Unu mare de prommissas e sas peraulas de sempere: Sardigna a sos Sardos! Unu teatru mannu che cussu de s'attoppu de su Nuraghe Losa, in ue su candidadu Guvelnadore s'est presentadu che Capotribù Nuragiku in gherra contra sos romanos. Unu Guvelnu de caras noas e de zente noa chi deviat comintzare una manera noa de faghe politica (tottu goi naran….). Po sos chi b'an crettidu.
Po sos atteros est sa mattessi cantone, cussa chi intendimos dae candu semus naschidos, nois, e innantis sos jajos nostros.
A una paja e meses dae sas eletziones si comintzat a biere itt'este custu rinnovamentu. Partidos italianos, Assessores italianos, Guvernadore italianu e tando politica italiana!
De Sardu abbarran solu sos augurios de Bon annu nou dae s'amadu presidente de Tiskali, cun tantu de bandera tricolore in dasegus, a nos ammentare itte semus e itte amos a abbarrare.
Tando, puitte pianghere? Est cosa normale.
Sos partidos italianos, e los ando a elencare: Ulivo, Margherita, Verdi, Rifondazione Comunista, DS, suni espressura de su voluntade de Roma, de sas segreterias continentales, chi tottu attuan e tottu dezidin. Dae unu Guvelnu espressura de sos interessos italianos de dretta semus passados a unu guvelnu de espressura de sos interessos italianos de manca.
Comente innantis sas Juntas fini puru espressuras de sos interessos italianos Cristianos Democraticos o Sotzialistas.
In sa classe dirigente sarda, cun pagas eccetziones, s'ispijant cussos chi in limbazu politicu suni nados "cleavages", seberamentos, continentales! Dretta e Manca italianas!
Realidade chi est ben ispiegada dae su Contu de su coloru.
In tempos antigos b'aiat una idda in ue sa zente fidi unida e trivagliada in pasu, cun sos babbos chi ammaestriana sos fizzos a s'arte issoro e tottu vivian cuntentos. Una die mala, però, est cumparvidu unu coloru mannu mannu a duas concas, e da chi sa entre fit cuada in dasegus de sa muraglia de sa idda, sa zente pensaiat chi fini duos.
Los an timidos e ana preguntadu itte devian faghere po esse lassados in pasu!
Sa conca e dretta nariat de li battire meda de mandigare. Sa conca de manca su mattessi.
Dogni conca nariat chi si li aiant battidu de mandigare aiat cazzadu s'atteru coloru e donadu a sa idda sa paghe.
Sa zente at comintzadu a si seberare: chie a dretta, chie a manca e dognunu at battidu tottu su chi jughiat, tottu su laore de sa temporada, o po una conca o po s'attera. Custas mandighiana, e pius mandighiana pius ndè cheriana!
E sa zente de dretta creiat chi dende a mandigare a su coloru sou aiat a sa fine cazzadu s'atteru e appidu sa paghe e sa felizidade, sa zente de manca su mattessi.
Lastima chi niunu abbaidiada in dasegus de sa muraglia, goi s'aiat pottidu abbizzare chi sas concas fin divrescias ma cun sa mattessi entre!
Si sun seberados, si sun gherrados, si sun bocchidos ojos a pare, fintzas a cando su coloru est balziadu a intro sa idda e si los at mandigados chena nemmancu chi issos si nd'aere abbizzados!
Facile da cumprendere: su coloru est s'Istadu Italianu, sas concas suni sos paltidos, sa zente de sa idda suni sos Sardos.
Comente essire dae custa trista realidade?
Abbaidende addane de su muru, junghindesi tottu paris, poninde manu a sas ispadas e bocchinde su coloru.
Unu motu de cussentzia chi juttede chena iscorciatoias o atteros pensamentos a s'Indipendentzia.
Indipendentzia dae sos cumplexos, dae sos partidos e, a sa fine, dae s'Istadu Italianu.
Solu dae Indipendentes est possibile torrare Sardigna a sos Sardos, solu dae Indipendentes est possibile torrare a vida sa cultura nostra, sa limba nostra, s'historia nostra!
Su restu suni chistiones de badas po concas de coloros cun bentre piena.
